جمعية ماراتون بيروت

أطلب العلم ولو في الصين

ارشيف 2016
” أطلب العلم ولو في الصين …”
جملة مأثورة كنّا دايماً نسمعها والمقصود فيها إنو العلم ضروري مثل الخبز والهوا والمي .
الأحبة ،
العلم معيار حضارة الشعوب وأي قطاع صارت أهميتو مرتبطة بالمعرفة ومن هالحقيقة منعرف سبب نجاحات وعراقة دول بالمجال الرياضي كونها قدرت تصنع إنجازات من خلال كوادر إدارية تزّودت بسلاح العلم …
اليوم نحن بلبنان قدرنا نخطي خطوات بهالإتجاه ونعتمد برامج تعليمية بالمجالات الرياضية وبدينا نبني هرم من كوادرنا الرياضية اللي رح يكون على عاتقها مهمة كبيرة بإستنهاض الواقع الرياضي ببلدنا …
جمعية بيروت ماراثون صحيح مهمتها الأساسية صناعة أحداث رياضية أهمّا الركض لكن هالمهمّة كانت مقرونة دايماً بمبدأ ثقافي وهوّي تعميم هالرياضة وقدرنا بكل فخر وإعتزاز نعمل حالة بالبلد والدليل هالكم الكبير من نشاطات رياضة الركض على طول مساحة لبنان الجغرافية …
وهون بوصل لأشكر الجامعة الحديثة للإدارة والعلوم (MUBS ) على ثقتها بجمعية بيروت ماراثون لتكون إتفاقية شراكة وتعاون نابع من إيمان بدور ومكانة الجمعية ومع طرف ثالث مشهود إلو بالعراقة الأكاديمية وهيّ جامعة كارديف متروبوليتان لإعتماد نظام دراسي تحت مسمّى ” الريادة في الإدارة الرياضية ” هالخطوة اللي بعتبرها نقلة نوعيّة بمجال الرياضة ….
اليوم الفرصة متاحة أكثر أمام شبابنا الرياضي ليرفع من شأنو ويصعد درجات نحو طموحاتو من خلال الإنتساب لهالبرنامج وفيّ أكّد إنو جمعية بيروت ماراثون رح تواصل مشوارها بمجال رياضة أفضل لغد أفضل…
بختم بالشكر للصديق زيد خيامي مدير عام الشباب والرياضة لحضورو معنا والشكر أيضاً للصديق دكتور حاتم علامي اللي آمن فينا من البدايات وبقلّو مشوارنا طويل وأهدافنا كبيرة لإنّو لبنان بيستحق يكون دولة ريادية وشبابو الرياضي صنّاع التغيير وبيبقى إنّي عبّر عن عظيم تقديري لممثل جامعة كارديف متروبوليتان الدكتور آلن هاردمان اللي إجا خصيصاً من لندن لهالغاية.
 
 
 
 
 
 
 
 
 
 
 
الوسوم

مقالات ذات صلة

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *