جمعية ماراتون بيروت

نحن بجمعية بيروت ماراثون منعتّز بماضينا اللي منبني عليه مستقبل طموحاتنا

ارشيف 2017
قصتنا بجمعية بيروت ماراثون صار عمرها 15 سنة ونحن مدركين الحقيقة اللي بتقول : ” اللّي ما إلو ماضي ما إلو حاضر ومستقبل ” من هون نحن بجمعية بيروت ماراثون منعتّز بماضينا اللي منبني عليه مستقبل طموحاتنا هالطموحات اللي ما إلها حدود واللي حدودها نبض سنوات عمرنا .
كثار منكن بيعرفوا إنّو قصتنا كان وراها عامل الصدفة وهوّي الحادث اللي تعرضتلو وأنا عم بركض مع عدد من الأصدقاء تحضيراً لمشاركة ماراثونيّة خارجيّة ولإنّو أقدارنا مش خيارات طرحت فكرة ماراثون بيروت وأنا بالمستشفى وبدأنا الإجراءات وإنتهت مع خروجي من المستشفى وهيدا كان عام 2002 وبعدها بسنة كان أول سباق ماراثون بلبنان وبالجوار العربي وهون ما فيّي إلاّ ما أذكر بالخير أخ عزيز وغالي هوّي زيد خيامي مدير عام وزارة الشباب والرياضة على وقفتو ودعمو إلنا بجمعية بيروت ماراثون .
عام 2003 كان الماراثون الأول وشعارو : ” ركضي ركضي يا بيروت ” وبذكر إنّو غالبية اللبنانيين والعيلة الرياضيّة تحديداً بوقتها تساءلوا شو عمل تعمل مي الخليل هالمرأة اللي جايي من خلفيّة إغترابيّة وشو هالنشاط الرياضي الماراثون ومين قدرتو يركض بلبنان مسافة 195 ,42 كلم .
وعملنا السباق وكان عبارة عن مجموعة سباقات لمسافات مختلفة وبلغ عدد المشاركين 6 آلاف عدّاء وعدّاءة من 46 دولة عربية وأجنبيّة.
من هون بلشت قصة، أكبر من رياضة، وهيي قصة ماراتون بيروت
 
 
 
 
 
 
 
 
 
 
 
الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *